متندن فکرگه اؤتیله دی

ایجاد تجربه سیدن تامچیلر
_________________________________

متندن فکرگه اؤتیله دی
>>>>>>>>>>>>>>>>>>>
ایجاد عالمیده: یازووچی، متن و اؤقووچی دیگن اوچ بورجک بار، سیز شولردن بیری سیز. فکر، سؤز انه شو اوچ بورچک اؤرته سیده یاته دی.
- بیرینچی بورچکده یازووچی توره دی. او اؤز اثریگه ته لی فکر و مساله لرنی جایله یدی. اؤی-فکرنینگ سیاز ویا چقور بؤلیشی یازووچیگه باغیلق. اگر یازووچی کؤپ و خوب اثرلرنی اؤقیگن بؤلسه، حیاتی مشاهده لری کینگ و تیرن بؤلسه، تیلینی-ده، یخشی بیلگن ایسه، شو بیلن بیرگه یوکسک درجه ده یازیش قابلیتی بؤلسه یازیشلری پیشیق چیقه دی. اثرنینگ یوکی سلماغی آشه دی. اصلیده بیر ایجادکارنینگ کوچی، عقل و ذکاوتی، بیلیم و قابلیتی بیتیلگن معلوم اثرگه سینگندیریلگن بؤله دی. متن بغریده گی فکرلرنی ذاتن تیل یوزه گه آلیب چیقه دی. یازووچی تیل آرقه لی مقصدینی اؤز اؤقووچیسیگه یتکزه دی.
- متن فکرنی اؤزیده سقلب تورگن، یازووچی نینگ حس- هیجانی، اؤی- اندیشه سی، حیاتی خلاصه یو صنعتینی نمایان ایتب تورگن إیدیش، واسطه دیر. دیمک متن آرتیده اجتماعی، روحی، فلسفی مساله لر توره دی. متن إیدیشی ایزگو نرسه لردن تؤله یاکه بؤش بؤلیشی قلم چیکووچی نینگ استعدادی، مهارتی، تؤپله گن تجربه سی، اؤقیگن یخشی اثرلریگه باغلیق. إیکّینچی بورچده توروچی متنّی تیل میدانگه آلیب چیقه دی. تیل متن نینگ آچقیچی سنه له دی. تیلنی اعلی درجه ده بیلمه گن، پخته متندن یخشی تؤینمه گن یازووچی نینگ اثری بؤش بؤله دی. چیندن هم تیل کؤپریک یا خود تونِل وظیفه سینی اؤته یدی. باشقچه قیلیب ائتگنده تیلدن متنگه اؤتیله دی.
- اوچینچی بورجکده اؤقووچی توره دی. اؤقووچی نینگ آلدیده ایسه متن. او انه شو متنّی اؤقی آلیشی، اینگ مهمی توشینه آلیشی شرط. یازووچی نیمه دیگنی متندن بیلینه دی. تیکست جواهردن تؤله یاپیق صندوقچه گه اؤخشه یدی. شونینگ اوچون هم متننی آچیش، اونی اؤرگه نیش، انگلش دیگن ساحه بار. بو ساحه گه«هرمنوتيك » دیئیله دی. اونده متننی کشف قیلیش، تیکستنی تفسیر قیلیش و معنالش مساله لری تدقیق قیلینه دی. سؤزنینگ هر قنده ی معناسی، یازووچی کؤزله گن مقصد انه شونده اؤرگه نیله دی. متننی اؤرگنووچی شخص تؤغری میتود و یؤنه لیش و واسظه لردن فایده له نیب، ایجادکارنینگ مقصدلرینی بیان قیله دی و توشونتیریب بیره دی. معلوم بیر متنّی توشونیش و انگلش اؤقووچی نینگ سویه سی، بیلیمی، مطالعه قمرویگه باغلیق. جدّی اؤقووچی کتابدن ینگی- ینگی معنا و مساله لرنی تاپیب چیقه دی. معلوم اثرنی چقور توشونیش، تیرن بیلیش اؤقووچی نینگ نه قدر تیل بیلیشیگه باغلیق. چونکه، هر اوچله بورچک نینگ ایجاد قورالی تیلدیر. یازووچی تیلدن استفاده قیلیب، فکرلرنی اثرگه جایلشتیره دی. متن هم اؤز نوبتیده تیل میدانی حسابلنه دی. متننی توبیگه کیریب باریش کیشیدن کتته محنت و تیل بیلیشنی تقاضا ایته دی. و نهایت معلوم اثرنی یوقاری یاکه توبن توشینیش یازووچی نینگ قنچه لیک تیل بیلیشیگه باغلیق. تیل بیلن قدرتلی قورالنگن اؤقووچی پیشیق متندن یازووچی اؤیلمه گن، ائتمه گن نرسه لرنی-ده یوزه گه آلیب چیقه دی.