تیل و ادبیّات
درباره سایت
آخرین مطالب
امکانات وب
ایشانچ تۉره
ـــــــــــــــــــــــــــ
حکایه (تراژیدی) یرمیمنی ایزلهیمن
ـــــــــــــــــــــــــــــــ ـــــــــــ
کیلینگ باشده اؤزیمنی ته یشتیرهی. مېن دوکتور هولکر سینشته بۉله من. حیاتیم نینگ شوگینه یشیل فصلیده، یقین-یقینده باشدن کېچیرگنلریم نینگ بیر قتیمینی، بیر شینگیلینی حکایه قیلیب بېرهیین، دردلریمنی بیر یازغیره ین دېدیم. بو گپلرنی اوییمدن، ایش خانهمدن، یقینلریم، دوستلریریم دورهسیده توریب گپیره یاتگنیم یۉق. اۉته آغیر فضا آستیده، ساووق، جوده یم جمباقلی، ساکن و قؤرقینچلی بیر مکاندن توریب، إیچ دردیمنی سیز بیلن بؤلیشهیپمن. اېر-خاتین ایکّیمیز هم دوکتور بۉلیب شفاخانه ده ایشلهیمیز. قیش آلدی هوانینگ کېسکین اۉزگریشدن کسللرنینگ سانی آرتیب بارماقده ایدی. شفاخانهمیزده دوکتور یېتیشمسلیگی بیلینیب تورهدی. معاینه خانه میزگه؛ حتی که، اویئیمیزگه هم کسللر کېلیشی نینگ کېیتی اریمهیپدی. ایش ساعتلریمیز کۉپهیگن آنلر اېدی. دوکتور تېمور سینشتهنینگ ایشی اۉته آغیر، او جراحلیک قیلهدی. مېن اېسه بالهلر دوکتوری من. انترنېت صحیفهلری آرهلب، جهان ایوانی طبابتیده یوزه بېرهیاتگن ینگی لیکلر، واقعه-حادثه لرنی اۉقیب باره من. «کوید-19» دېگن بلا دنیا ینگیلیکلرینیگ باشیده. عمه وی یتکزمه لرنی بند قیلیب توریبدی. مجازی ترماقلرده قره-مه قرشی معلوماتلر بارگن سری تۉلقینله نیب، تؤر یایه باشله گن بیر پئت ایدی. چیندنم دنیا بۉیلب بو ویروس یشین تیزلیگیده ترقهلیب بارماقده اېدی. بیز اویده عایله بغریده اېدیک. اېندی آدملر آرهسیده: " اۉلهت ترقه باشلهبتی، ویروس ختایدن کېلیبتی ایمیش! اوزاق-یقینلرده انسانلر توتدهی تۉکیلیب اۉلهیاتگنمیش"- دېگن دوو- دوو گپلر یوره باشله گن کیزلر ایدی. دوکتورلر اللــه قچان مسألهنی توشینیب، معمّانینگ ته گیگه یتگنلر. عادی آدملر آرهسیده قؤرقو اورچیگن، وهیمه قؤزغلان سالماقده. کیمدیر اونده ی، کیمدیر بونده ی دېیشهدی. إیکّیمیز هم اویمیزده چقیریلمه گن قاره مهمان گپینی بیلگنلریمیزگه ته ینیب داستان قیلدیک... شفاخانهدن قۉنغیراق قیلیشدی، ایریم جواب قیلرکن دقت بیلن ایشتیدی... کسلخانه میزده یوقیملی، خوفلی کسللیک کون ترتیبیگه چیققنینی خبر قیلیشدی. ضرور چاره-تدبیرلر کۉریش کېرهکلیگی همده اېرتهگه علمي مجلس بارلیگینی ایتیب، بر وقتراق ایشگه کېلیشیمیزنی سۉرهشدی سیم قاقن تامان. اېرتهسی غیز اېتیب باردیک شفاخانهگه. علمی کمیسیونده محور تېورهگیده گپیریلدی...کون بۉیی کسل کۉرهمیز. نظریمده چیق-چیقلب تورگن ساعت میللری چرچاقدن زورغه سودرهلهیاتگندهی گویا. اؤشه کونی هوا ساووق، آسمان اوزره قاپ-قاره قه لین بولوتلر سوزه یاتگندی. قویاش نینگ آنده-سانده بؤزریشیدن فایده یؤق. إینجیق هوانینگ طعمی قاچیب، تومشیغی آسله نیب، کون آبدان ساوی باشلهگن پیتلر اېدی. تیریکچیلک آدملرنی تین آلیشگه مجال بېرمهیپتی. دهلیزده بیتابلهگنلرنینگ یاقیمسیز اینگراق تاووشی اېشیتیلهدی. باله کَیلرنینگ قی-چوو آوازی، خاتین-خلچ نینگ غاوور-غوور گپلهشیشی ساکنلیکنی بوزیب یوبارگن. کسللیکدن هم کۉره کمبلغللیک، ناچارلیک بیمارلر یوزلریگه قلقیب چیققهنی بیلینیب توریبدی. خیالیمده کسللر:" دوکتورآپه! اوّل قارنیمنی تؤیغیزینگ، کیئین کسلیمیزنی دوالنگ"-دیه یاتگنده ی. یورهگیم غش تارتهدی بو منظرهنی کۉریب. إیچ بوروق، تاشمه، توماو اوشلهگن کسللر کۉپراق کۉزگه چلینهدی. قۉلیده یاش بالهسی، کلته-کلته یۉتلهیاتگن خاتینلر صفی اوزون. ایسّیغی چیقیب، نفس آلیشی قیینلـَشگن بیمارلرهم کۉپهیه بارماقده ایدی. بوتون ولایتده اۉلیم اؤز کۉلنکهسینی سالیب توریبتی، آدملر آرهسیده تلفاتلر بار... ایشده میز، انچه گچه قالدیک شفاخانهده اۉشه کونی. ایش ساعتلریمیز آشگن، خذمت قیلیب توریبمیز هر حالده. بیر هفته گه بارمهی وضعیت کېسکینلشدی. احتیاط چارهلرینی کوچهیتیرگن بیر رژیمده کون بۉیی کسل کۉرهمیز. کسللر:" دوکتور آپه نسخه جدید یازیب بیریدینگیز، ایندی دار-درمان پولینی قیردن قیله لیک؟!"-دیگنچه بیزره یب، دادلب بؤزه ریشه دی. قویاش باتیشگه بیر ساعتچه بار اېدی هلی. بۉساغه هتلب، تشقریگه چیقیشیم بیلن شهرده تونیکه إیدیشلرده ایسریق توتهیب، پول تاپهیاتگن بالهلرگه کۉزیم إیلیندی. عجیب بیر حالت! تۉقیز-اۉن یاشلر چمهسی یوپون کییینگن بیر باله کېله سالیب، توتب تورگن ایسیریغینی تېگرهمدن ایلنتیریب، " خدا یؤلیگه بیرینگ بیر نیمه، ایسیریق مینگ دردگه دوا، اسپند بلا بند"- دېگنچه مېنگه تامان قۉلینی چۉزیب توریبدی. تنگه-تونگه اوزیش ایلینجیده باشقه ایسیریقچیلرهم یاپریلیشیب:" مېنی آدمیم، بو مېنی آدمیم نری تور "- دېیه بیر-بیری نینگ کۉکسیدن سوریشردی. باله لردن بیر-ایکیتّهسی:"منه بویم ماسک، ماسکنی قؤچقاری مینده کو! آلینگ-ای، آلیب قالینگ کرونادن اسرهیدی سیزنی؛ آنم ینگی تیکتیله، کرونانی توشیغیدن آسمی قؤیمه یدی"- دېیه قیچقیریب توریشیبدی. حالدن تایگن درجه ده چرچه گنمن. ایشدن اویگه قهتیشیم کېرهک ایدی. کیچ پئت ساعت سکّیزگه یقین مېن تورموش اؤرتاغیم دکتور سینشته بیلن خیرلهشیب، اوییمگه قهتیب کېلدیم. دوکتور نوبتچی بۉلیب شفاخانهده قالدیله. قهیاققه قولاق آسمهنگ ینه اۉشه-اۉشه "کرونا"، "ختای ویروسی"-دیگن گپ-سؤزلر تیللرده داستان. کته-کیچیکنینگ آغزیده شو گپ. کیشیلر تلویزیون قرشیسیده یاتیب آلیب، بوتون دنیادن خبر تینگلهشر، ایشیتگنلرینی باشقهلر بیلن بۉلیشیر، بو خبر تۉغری، او ناتۉغری دېگن تارتیشولی گپلر راسه قیزیگن بیر پَیت. کیمدیر قۉرقیب وهیمه قیلسه، ینه کمدیر «اسرهسه بلا یۉق، اسرهمسه پناه یۉق!»دېییشردی. همه هدیکسیرهب یشهیدی. آدم اۉز سایهسیدن قاچهیاتگن کونلر کېلدی باشلرگه... اېرتهسی شاشیلینچ شفاخانه گه کېلدیم. ایشخانهم گه قهیریلهیپکن اېدیم هم که، جانیم جیمیرلب، سېسکهنیب کېتدیم. عمریمده بیرینچی بار تابوت کۉریشیم اېدی. اینیقسه ایکیته اۉلیکنی بیر پیتده شفاخانهدن آلیب کېتیشلرینی کۉریب، بوتون وجودیمنی قوتوغو چولغب آلدی، قۉرقووگه توشدیم. بوندهی یوقوملی کسللیک آدم تنلهمهیدی ایمسمی. غفلتده قالدینگمی اونینگ توزاغیگه إیلینیب، تائیب ییقیلهسن. اۉنگلهنیشینگ آسان کېچمهیدی... سؤنگ کېچ بۉلهدی کېین. اوییمیزده ایدیک، همان کوچیتیریلگن بیر رژیمده إیشلب کیلماقده میز. بیر هفته اؤتر-اؤتمس اېریم دوکتور سینشته اۉزینینگ بی تابلیگینی ایتدی مېنگه. یوره گیم شو ایتیب، رنگ و قوتیم اۉچیب، قۉرقیب کېتدیم، یۉغ اېی؛ کۉرینیشینگیز یخشی آته سی،- دېدیم إیشانقیره ب. و دراو آله سالیب ایسیغینی اۉلچهدیم، قرهسم تیرمامیتر 39درجهنی کۉرستهیپتی. إیچیمگه شبهه یوگوریب، هیجان بوتون بدنیمنی چولغب آلدی. إیسیتمه لب سیز اؤتیب کیته دی، دیه بیر پیاله موزدهی سوو کېلتیریب، پراسیتامول ایچیردیم. نی کؤرگولیک! قیسی تیل بیلن ائتهی که، کۉپ اۉتمهی شبههلریم حقیقتگه ایلندی. هه، قوریب کیتگور کرونا، هه کرونا!تیست قیلیب انیقله دیک بو آتی اؤچگورنی. دکتوریمیزنی اوشلبتی ایکن کرونا. اېر-خاتین ایکـّی دوکتور بیر بۉلیشیب، در حال قۉشیمچه احتیاط چارهلرینی کۉرهباشلهدیک. دوکتور سینشته کېچیکتیرمسدن قرنتین رژیمی گه اۉتدی. قویاش تیگه دیگن بَر هوا بیر خانهده جای سالیب، سویوقلیک بېره بېردیم. کۉکتلر، زیره، دارچین، جینسینگ، زعفران، زنجبیل، ایسپرهک، شیرین میه، لیمو، قلمپیر، انغیز، مرچ، ریحان، عسلر-او، قاو، یلپیز جاییگچه غملهدیک. اوزلوکسیز پرهیزانه آش-قـَتیغ یېتکیزیب توردیم کسلگه؛ کېیتینی اوزمسدن داری-درمانلرنی بیریشنی هم زۉرهیتیردیم. نیمه قیلسم هم تأثیر قیلمهیپتی. ایریم ایسیتمهدن دیر-دیرتیترر اېدی، یخشی بۉلگنی اۉرنیده کون سایین آغیرلشه باردی. بوتون عایلهمیزنی اضطراب اۉز شکنجهسیگه آلگن آغریقلی دملرگه قاریلگنمیز. آته-آنهلریمیزگه خبر قیلیشگه کېچیکدیک؛ اولر قیشلاق، آلیسیده توریشهدی. بالهلرنی محافظتی کتـّه ایش بۉلدی مېنگه. شفاخانه بارهیمی، باله-چقه گه قرهمی؟ بیر جانیم بیلن قهی یاققه چاپریمنی بیلمهی قالگنمن... تؤرت قبتلی اویرلردن بیریده یشه یمیز. وضعیتدن گمانلنگن قۉنی-قۉشنی بیزدن جیرکنه باشلشدی. همه نفرت ارهلش شبههلنیب قرهشهدی بیزگه. قۉلیمیز کۉکسیمیزده توتیب معامله قیلهمیز. محلهداش، قۉنی-قۉشنیلریمیز مېندن اینیقسه دوکتور تېمور سینشته دن شفا تاپگنلر. هر بیری نینگ دردیگه درمان بۉلگنمیز. باسیقلیک بیلن وضعیتنی کنترول قیلیشیمگه قرهمهی، قۉشنیلریمیز « بولرنی کرونا اوشلهگنمیش...!کۉچسینلر، دَب بۉلیشسین بوله!»-دېب یوریشیبتدی. اولرنینگ«چیقسینله، کۉچسینله، بو یېردن کېتیشسین بولر! شوم ایاغ اېکنله! بۉمَسه...»- دېگن دغدغه لری اوجیگه مینگن. آغیر بیر احوالده تۉشکده میخلهنیب یاتگن اېریم دوکتور سینشتهنینگ دردی زۉرهیدی. کرونا کسلنینگ مغدیرینی قییه باشلهدی. قۉشنیلرنینگ مشمشهسی یره اوستیگه گزهک بۉلیب توشدی. اطرافدهگی احوالنی کۉریب-بیلیب تورگن دوکتورنینگ یورهگی چۉکدی. «بولر کۉچمَسه، کۉرپه-تۉشهگینی کۉچهگه آتهمیز»-دېگن پۉپیسهلر ینگرهب توریبدی. باشیمیزگه خوددی آسمان قـَپیشگندهی گویا. کۉکدن لعنت یامغیرلری تینمهی قوییلهیاتگن سینگـَری بیر حالت حکمران اېدی. ...خیریت. وضعیتدن خبر تاپگن چېت اېل تشکیلاتلری بیزگه یاردم قۉلینی چۉزیشدی. شاشیلینچ چاره-تدبیرلر کۉره باشلهدیلر. آذیق-آوقتیمیزنی یېتکزیب توریشدی. داریلر و کېرهکلی چارهلر هم مهیا بۉلدی. حتی، اوییمیزگه جهازلر آلیب کېلیب، آکسیجن بیلن هم تأمینلشدی. "اۉزینگیزنی بای بېرمنگ دوکتور، اینگل کیچه، حیاتگه امیدوار بؤلینگلر"-دېب کۉنگلیمیزنی کۉتریشدی کون باتردن کېلیشگن مهربانلیک تشکیلاتیگه علاقه دار شخصلر. دوکتور تېمور سینشته گپیریشگه تیلی ایلنمهیدی. اونگه هوا یېتمهیپدی. اۉزیم انگلیسچهلب سۉراقلریگه جواب بېریب توریبمن. ایسیغی توشیب، کۉتریلیب تورهدی. دوکتور سینشتهنی40درجه تنه ایسـّیقلیگی قاوجیرهتیب بارهیاتیر اېدی...اوییمیزده کرونا کنترولدن چیقدی. ویروسنی قهی یېردن یوقتیرگنینی بیلمهیمیز. کېتمه-کېت داری بېردیم، بیر پس اۉتیب، ایسیغی 2درجه توشدی. بیر اۉزیگه کېلیب:"ایچیمده کېچهیاتگن جریانلرنی گپیریشدن عاجزمن هولکر. حیاتده اېنگ آغیر آغریق کرونا آغریغی بۉلسه کېرهک. یېت و سویهگیمی قییمهلهگیچدن اۉتگزهیاتگندېک، تنمده درد تویهمن" دېه اېزیلیب گپیردی دوکتور...اۉزیمنی زۉرغه توتیب توریبمن. مېن حمایه چارهلرینی کۉریب، یریم کاسه سویوق آش ایچیرهی دېب آلدیگه کیردیم. دوکتور سینشتهنینگ کۉزلری جیققه یاشگه تۉلدی. دردلرینی تیلی اېمس قرهشلری ایتهیپتی. اونینگ محبتلی کۉزلری سۉنیق، اؤته سۉلغین، ایچیگه نورهب بارهیاتگندهی. کۉزلری اچّیق یاشگه تۉلگن دوکتور سینشته «اولکر! نخاتکه مېن بو یاروق عالمنی ترک اېتسم، نخات مینگ بیر چیچک آرزو-امیدلریمنی گورگه آلیب کېتسم، نخات!!» دېدی مأیوس آهنگده مېنگه قرهب. إیچیمده أیغلب، دردیمنی زورغه یوتیب توریبمن. کؤنگیگه مدار بؤله یئین، دیب تسلّی بېردیم. بالهلرینگیز ساغیندی، تیزلیکده نصیب بۉلسه گُلدهی بۉلهسیز. ینه همیشهگیدېک جان و جگرلریمیز، دوستلر و اۉرتاقلرینگیز بیلن تۉپلهنیشیب، یخشی کونلرنی خوش قرشیلهیمیز، دېب یوپه تماقچی بؤلدیم. اوییمده من...سۉنگ مېن قازان تباقلرنی یووهی، دېب آشخانه گه باردیم. یېر و کۉک جای بېرمهیپتی. خانهمگه کیریب آلدیم. ناچارلیکدن یورهگیم تۉلیب ییغلهدیم؛ کملیگیم کېلدی، قۉلیمدن هیچ نرسه کېلمه یاتگنیمدن اۉکسیندیم. وضعیتگه داش بېرهالمهی، سېزدیرمسدن اوینی ترک اېتدیم. آچیق هواده بیر پس ایله ندیم، سۉنگ اوییمگه قهتیب کېلدیم، خانهمگه کیریب، ینه تۉییب-تۉییب کۉز یاشی قیلدیم. اوییمیز انجاملری تیلگه کیرگندهی، بیر ناخوشلیکدن درک بېریب توریبدی نظریمده. خانهلر هواسی بۉغیق و آغیردن آغیر؛ ساکنلیک چؤککن. بویوم-انجاملریمیز نوحه قوریب، عزا توتهدیگندهی گۉیا. اۉلیم دېرَزهدن تیشلرینی شقیردهتیب توریبتی. حیات ایریلیق کویینی چلهیاتگن مثال. دوکتور سینشتهنینگ کۉنگلی چۉکمهسین دیه، یوزلریمگه تؤر یائیگن مصیبت شرپه لرینی یشیریشگه اورینه من. هلی دوچ کیلمه گنیم قاره کونلر مینی سؤراققه توته یاتیر ایدی. کیله جک مینگه هلی قیده سن...؟ دیه یاتگنده ی. بو جمعیتلرده ائنیقسه یتیم باله لی خاتین ذاتی بختیلی یشب کیتیشی ممکن بؤلمه گن إیشلردن. یامان کون کیلمه سین، دیئمن. اگر بیر کار-حال یوز بیرسه بارمی... قدر و ارزشیم سینیب تمام بؤله من. بلکه کیمگه دیر کیره ک بؤلرمن، هه کیره ک! کیره کمن فقط ایرکلرنینگ قوچاغینی إیسیتیش، لحظه لیک شهوتینی قاندیریش اوچون، ایرمک اوچون کیره کمن...یتیم باله لریم چه؟... قالگن عمریم مینی خوددی شکنجه گه ساله یاتگنده ی. خیاللریم هلی بولر حلوا!-دیدی مینگه...دردلریمنی ایچیمگه یوتهمن..."اؤلیب-اؤلیب تیریله من" دیگنلر شو بؤلسه کیره ک. دوکتورنینگ جانی مېنینگ ایچیمده. بو جان إیچیمده ساویمه سین، دیئمن؛ بو جان کؤز اؤنگیمده بتمام اوزیلیشدن قؤرقه من... مېنی امیدسیزلیکدن باشقه نرسه اۉزیگه یۉلتمهیپتی. اۉزینگدن باشقه هیچ کیم سېنی اېشیتمهیدی؛ نه چاره قیلهیین! آسمان بلند یېر قتیق. اېنگ آغیر باتگنی هم انهشو یالغیزلیک اېدی مېن اوچون. اویقیم قاچگن، قیغوگه قاریلیب یاتیب من، توز تاتگیم کېلمهیدی. بالهلرنینگ ایزی-چوولری ایچ و بغریمنی اېزیب بارماقده. تالیققـَنیمدن بیر پَیت کۉزیم میزغیبتی. توش کؤریبمن. توشیمده بالهلیک قوچاغیگه آتیلیبمن. الغاق-دالغاق توشلر توفانی ایچره الجیرهیلهیمن، تلپسهلنهمن. کیئیم-کیچکلریم، کۉرپه-یاستیقلر بیلن آلیشهمن. "اېشیتمهیپسیزمی؟ شونچه چقیره من نېگه تاووشینگیز چیقمهیدی آتهسی! قؤللرینی بؤئنیمگه یاستیق قیلگن دوکتوریمدن درک یؤق. قاره باستدی...اییی اییی؛ وادریغ! کۉرینمس قاره قۉللر حاصلدار درختنی أیقیب، ایلگیمدهگی قیپ-قیزیل آلمهنی"یولقیب کېتدی. ایوقومنی نریگه سوریب، اۉرنیمدن سَپچیب توردیم. قرهسم یانیمده هیچ کیم یۉق. یاستیغیم نینگ یریمی بۉش. یاپیریم ای! دېیه یاقه اوشلهدیم. ینه توشلریم نینگ دوامی اېسیمگه کېله باشلهدی. آپه-سینگیللریم، بۉیداش دوگانهلر إیله " یشین-یشین"،"خاله-خاله" اۉینهماقده اېکنمیز توشیمده. یخشی کۉرگن قۉغیرچاغلریم بیلن مستانه اۉینهیپمن. بالهلیک سلطنتی اوستیده حکمرانمن. "بالهلیگیم پاشالیگیم"-دېگنلریدېک. توشیمده بیخواستدن قۉغیرچاغیم قنی؟! کیم آلدی قۉغیرچاغیمنی؟!-دېب داووشیم باریچه قیچقیریبمن؛ تاماغیم ییرتیلوگدېک بقیریبمن اېکن بیلسم. باله لریم بیلن اویده یالغیزمن، یالغیز. عمر یۉلداشیم بیر هفتهدن بویان شفاخانهده یاتقیزیلگن. بالهلرنینگ نان و آشینی بېرگنی اویگه کېله من و ینه شفاخانه گه باره من. یالغیزلتمهی، کۉز قاره بۉلیب توریبمن. کېینگی پیتلری نفس آلیشی ینه ده اۉته آغیرلشدی. ماسلمه یاردمیده قیئنه لیب نفس آلهدی. شو بوگون وقتلیراق اویگه کېتیب قالدیم. توره ر جایمیز بناگه قرهب قهیریلرکنمن، بالهلریم دیرهزهلردن چوویللشیب،کۉزلری مۉلتیرهب ییغلب توریبتی. اویگه کیریب دراو دیرهزهلرنی آچیب هوا المشتیردیم. بالهلریمنی آووتدیم، یېدیردیم و ایچیردیم. اولر آتهسینی ازّانچه ساغینگنلر. مېن اېسه آتهنگیز بوگون، اېرته کېلهدی قیلیب، گودکلرنی یوپنتیره من. شو ذیل تون بۉلیب، کون بۉلیب عمر اۉتهیاتیر ایدی. کونلری گرهنگسیب تالیققنیم باعث توندن هم اۉسانگنمن. تون دیگنی مین اوچون یالماغیز البستی. تون بۉله بېرسه یورهگیم بېزّیلهی بېرهدی. کونده معنا کؤپ ایکن. هر قه لی ماما قویاش یوزینگه جیلمه یه دی؛ کوچه باله لری نینگ شوخ-شوخ اویئن قیراق تاوشلری دردینگنی آله یاتگندهی... کاشکی قویاش باتمسه، تون بۉلمسه، دېیمن ایچیمده. کۉنگلیم بیر قیلگه آسیغلیق. دوکتوردن خبر آلیش اوچون آره -سیرهده شفاخانه بیلن باغلهنیب توریبمن. تونلر همان مینی ایتیمنی قیمه لب قیناققه آلیب توریبدی. تانگ سحر اویغانیب کېتدیم. دیره زلردن کؤچه بؤیلب تونگوله من... دوکتور سینشته نینگ صلابت تؤکیب تورگن بؤییگه کؤزیم توشرمی دیئمن. ینه کیچ بؤلیب قالدی. مینی ایزه یاتگن آنلر یقینلشماقده... ...قندهی اوخلب قالگنیمنی بیلمهیمن. تون یریم اویغهنیب کېتدیم. کوچه یاغدوسی نینگ یلّیغی پرده آرتیدن اویگه توشیب توریبتی. ینه مینی قاره باسگن اېکن، آغیر توردیم جاییمدن، تېبرهنگیم کېلمهدی. قرهسم دوکتور سینشته یاتگن تخت تۉشک بۉم-بؤش. یالغیز اۉزیممن ... تشقری نینگ بیر قتیم یالقینی دیرزه تیرقیشدن دیوارگه آسیلگن دوکتورنینگ تصویریگه توشیب توریبدی. کؤرکم عکس شیشه آرتیدن صلابتله پارلب یپتدی. کولگیچلری إیچیگه چؤغ سالدی. دیوارده گی دوکتورنینگ عکسینی آلیب بغریمگه باسدیم و هونگرهب-هونگرهب ییغلهدیم. مین بیلن دوکتور اجره تیب تورگن سیمان شیشه نی آلیب تشله دیم. صورتگه تیرمولیب آوازیم باریچه أیغله دیم.کۉزلریمدن آققن دوو-دوو یاشلر دوکتور صورتنی هۉل قیلیب یوباردی. اچّیق کۉز یاشلریم کولیب تورگن لبلرینینگ سېوگی عمانیگه غایبانه قۉشیلیب کېتدی. یوریب، ایلهنیب، توننی تانگه اولب چیقدیم... قویاش اېندی نور ساچه باشلهگندهی. آغیر وضعیتگه قرهمی، آدملر تیریکچلیک عرابهسینی تېبرهتدی دېب شهر تامان حرکتلنماقده. کۉچه ده قیسی دیر باله نینگ : "آلیب قالینگ! ییریک-ییریک خانگی، مزهلی سیمیز تاووق غلهسی فقط مینده!مینده!!"-دېگن قیچقیریغی اینگره یپتدی. ایرتهلبکی چایگه چاغله نیشگه مجبورمیز. آتهلریسیز بالهلریم آوقتلنگیسی کېلمهیدی سیره. بیر پَیت اۉغلیم: «آنه-آنه! تیلفونده: " دوکتور هولکر سینشتهنی چقیر دېیپتی کیم دیر»-دېدی. یا پیریم، دېیه یوگیره سالیب گۉشکنی قولاغیمگه توتدیم؛ سلاملهشیب، جواب قیلدیم تیلفونده. تـَنیش آواز شفاخانه رییسی اېدی. «تقدیر اېکن؛ سیز اېندی شفاخانهگه کېلیب اۉتیرمنگ، علاجی یۉق. بالهلرینگیزگه باش بۉلینگ، سیزگه تۉزیم بېرسین؛ صبرلی بۉلینگ. دوکتورنی قۉلدن بـــــې.....ر...دیک!»- دېگن ییغی ارهلش آواز مېنی تیریکلهیین اۉلدیردی. اؤشه پئت او اېمس، مېن اېدیم تابوتده یاتگن. بۉغزیم ییغیگه تۉلیب. اخخخخخخ! وادریغ! یاستیغیم یریم بۉلدی؛ بختیمدن ایریلدیممی هلی؟! ایندی یرمیمنی قیدن إیزلب تاپه من، دېگنچه چوقور آه چېککنیم اېسیمده... منه ارهدن بیر ییل اۉتهی دبب قالدی. سیزگه ته نیشتیرگه نیم اۉشه دوکتور اولکر سینشته بۉلهمن، منه یانیمده بیر قیز، ایکـّی اۉغلیم و آنه جانیم توریشیبتی. هوا ساوی باشله یپتدی. بیر-ایکـّی ساعتلردن کېین قویاش افققه باش قۉیهدی. اوییمیزگه قهتیشگه ناچارمیز. بیز شو لحظه دوکتور تېمور سینشتهنینگ سۉنگّی منزل و منگو مکانی اوزره کؤزلر تؤله یاش آیاق اوستیده توریبمیز. دیدار قیامتگه قالدی، بو بارسه کېلمس جایگه اوچته بالهمنی یېتکلب کېلدیم. تۉرتاولـَشیب قبرنی قوچاقلهیمیز؛ ییغلهیمیز، قبردن تاووش کیلمه یدی. بالهلریمنینگ«آته جان!!!»- دېگن آوازینی هیچ کیم اېشیتمهیدی اېندی. غریب سینشتهمیزدن درک یۉق. اونینگ مزاریگه اوشاق تاشلر اېمس، یورهگیمنینگ قۉری، درد و غمینی یاغدیرماقدهمن. الوداع دېیمن دوکتوریم! الوداع!!! شونلرنی سیزگه حکایه قیلیب بیره رکنمن، سنشته م قبرینی یالغیز قالدیریب کیتیشگه مجبورمن ایندی. میلی مین دربدر بؤلی، یششگه محکوممن. سین ایسه منگو آرام آل دوکتوریم! اۉقیگـَنینگیز حکایهنی مېن انه شو منزلدن، قبرستاندن توریب، کۉزیاشگه کۉمیلگن حالتده سیزگه گپیریب بېردیم. خاتین لعنتلنگن بیر جمعیتده مینی نیمه لر کوتماقده بیلمه یمن. بیراق اؤزیمنی قاره قره شلرگه قربان قیلمس لیککه تیریشیب کؤره شه من. باله لریم حقی حرمتیگه مین جوابگرمن، فقظ مین. سؤزیم نینگ سؤنگگیده بیز کۉرگن داغنی سیز کۉرمنگ...دیه برچهگه اېنگ اېزگو تیلکلر تیلب، خیرلشه من. خدمتگارینگیز، دوکتور تېمور سینشتهنینگ نامراد هولکری
سوالات متداول
چرا حکایه (تراژیدی) یرمیمنی ایزلهیمن اهمیت دارد؟
این موضوع به دلیل اطلاعات و کاربردهای مرتبط، مورد توجه کاربران قرار گرفته است.
مهمترین نکات درباره بیلن چیست؟
جزئیات مهم و نکات قابل توجه درباره بیلن در متن مقاله بررسی شده است.
آخرین اطلاعات درباره دوکتور چیست؟
جدیدترین اطلاعات و تغییرات مربوط به دوکتور در این گزارش ارائه شده است.
برچسب:
نویسنده: ترانه قنبریپور